Guðrún var í morgun (sunnudaginn 24/1) í þættinum hjá Sirrý á RÚV. Megininntakið í spjalli þeirra var eftirfarandi:

Gamalt máltæki segir að heimilið sér þar sem við hengjum hatt okkar – þótt í dag séu flestir hættir að ganga með hatt. Mörg göngum við hins vegar með húfur og væntanlega er því heimilið þar sem við hengjum þær eða hendum frá okkur.

Heimilið er samt ekki bara staður til að hengja hattinn, heldur höfuðvígi okkar og aðalyfirráðasvæði ef svo má að orði komast. Og þar ætti því að vera auðvelt að innleiða GRÆNAN LÍFSSTÍL, en hvernig gerum við það.

Auðvitað eru margar leiðir til þess en sú fyrsta er samt að mínu mati jákvætt viðhorf. Ég hitti eina vinkonu mína nýlega, sem sagðist hafa orðið mjög fúl þegar hennar sveitarfélag fór að gera kröfu um að íbúar þess flokkuðu sorp. Ég skildi auðvitað ekki hvers vegna, því hún var með þessa flottu þriggja hólfa flokkunarfötu í eldhúsinu – svo ég sá nú ekki að þetta gæti verið mikið mál.

Henni fannst það hins vegar því hún hafði byrjað ferlið í mótþróa. Hún sagði mér svo að um leið og hún fór svo að flokka breyttist viðhorf hennar og þá var þetta ekkert mál.

Og það er einmitt það sem ég held – að þegar við breytum viðhorfi okkar til GRÆNS LÍFSSTÍLS þá er hann ekkert mál. Hann vex okkur ekki lengur í augum þegar við höfum jákvætt viðhorf til hans. Og hvað getum við svo gert á heimilinu sem kostar okkur alls ekkert – heldur sparar þvert á móti peninga þegar til lengri tíma er litið.

Fyrsta er auðvitað að spara rafmagnið. Það kostar sitt – svo þar má spara drjúgan skilding yfir árið – að ekki sé nú talað um á fimm ára tímabili.

Það er frábært að setja sér þá reglu að slökkva ljós í öllum þeim herbergjum sem enginn er í. Ég var í heimsókn nýlega hjá annarri vinkonu minni – og ég beinlínis VARÐ að standa upp og slökkva ljós í fjórum herbergjum sem kveikt var í – án þess að nokkur væri þar inni.

Svo er um að gera að slökkva á tölvum, sjónvarpi og DVD spilurum að kvöldi dags – og líka routernum ef þú ert með nettengingu. Ef enginn er að nota þessi tæki á nóttunni er ekki ástæða til að borga rafmagn fyrir þau. Eitt sem líka skiptir máli er að setja potta og pönnur á rétta stærð af rafmagnshellu þegar verið er að elda. Ef hellan er stærri en hitaflötur pottsins þá erum við að sóa rafmagni.

Varðandi þvottinn okkar, þá sparar það bæði tíma, peninga og þvottaefni, að ganga aðeins lengur í fötunum áður en þau eru þvegin. Í mörgum tilvikum er fólk að þvo fatnað sem er í raun ekki óhreinn – heldur hefur bara verið notaður í einn dag. Ullarfatnað má hengja út á snúru eða svalir til að viðra hann aðeins, svo ekki þurfi að þvo hann eins oft.

Næst þegar þú þarft að skipta um ljósaperu hjá þér væri ráð að kaupa sparperu, einkum í ljós sem loga lengi í senn. Þar er sparnaðurinn mestur.

Flokkun á dagblöðum og fernum ætti að vera auðvelt mál fyrir alla, þar sem flokkunargámar eru nú staðsettir í öllum hverfum á höfðuborgarsvæðinu og við flokkunarstöðvar í dreifbýli.

Margir gagnrýna Bandaríkjamenn fyrir að vera aftarlega á báti í umhverfismálum. Ekki má þó rugla saman þar alríkisstjórninni og svo íbúum landsins. Þegar ég hef verið þar á ferð og farið í heilsuvörumarkaði – má gjarnan sjá viðskiptavinina taka þunnu plastpokana - þessa sem við setjum grænmeti og ávexti í – upp úr töskunum sínum til endurnotkunar. Sannarlega betri hugmynd en að henda þeim.