“Ég læri af reynslunni og með þeim lærdómi skapa ég betri framtíð.”
| Grænn lífsstíll og heilsa |
| Mánudagur, 18. Janúar 2010 01:11 |
 Guðrún var í morgun (sunnudaginn 17/1) í þættinum hjá Sirrý á RÚV. Megininntakið í spjalli þeirra var eftirfarandi:Heilsan er mér alltaf sérlega hugleikin, kannski vegna þess að ég hef þurft að hafa svo mikið fyrir því að halda minni góðri. Af reynslunni hef ég lært að hún er á mína ábyrgð – og lít jafnframt svo á að aðrir beri ábyrgð á sinni heilsu. Í mínu tilviki er það mataræðið sem hefur skipt mestu um að halda góðri heilsu – og líkaminn lætur mig vita á heldur óþyrmilegan hátt með verkjum og vanlíðan ef ég vík mikið út af því. Ferðalög eru mér erfiðust – þrátt fyrir að ég elski að ferðast – því þá ræð ég ekki fæðuvali mínu á sama hátt og þegar ég er heimavið. Líkamar okkar ganga fyrir orku sem þeir eiga að fá úr fæðunni. Séu gæði hennar hins vegar ekki góð – verður útkoman svolítið eins og að setja lélegt bensín á bíl. Vélin – eða líkaminn okkar fer að hiksta – og við fáum alls konar „kvilla“ sem stundum leiða svo til sjúkdóma. Þegar ég tala um GRÆNAN LÍFSSTÍL lít ég svo á að hann felist meðal annars í aukinni meðvitund um umhverfi okkar og því sem við getum gert til að bæta það. Hið sama á auðvitað við um líkamann – því hann er hið eiginlega nærumhverfi okkar. Ef þú vaknar til dæmis með höfuðverk er ágætt – í stað þess að teygja sig strax í verkjalyf – að skoða hvað þú varst að borða í gær. Höfuðverkurinn gæti verið afleiðing af feitum mat, djúpsteiktu snakki, lakkrís, súkkulaði, ostum, bjór eða rauðvíni, einkum ef það er ekki af lífrænum uppruna. Það er nánast alltaf orsök og afleiðing í þessu ferli eins og öðrum. Lifrin tekur að sér að skila eiturefnum úr líkamanum – og samkvæmt kínverskri læknisfræði er hún tengd við augu og höfuð – svo þegar við leggjum of mikið á hana sendir hún okkur kvörtunarbréf, til dæmis í gegnum höfuðverkinn. Við höfum hins vegar ekki tamið okkur að hlusta, hvorki á hana né önnur líffæri líkamans - en NÚNA er kannski rétt tíminn til að fara að gera það. Eitt af því sem er örugglega hægt að gera til að bæta heilsuna er að borða meira af lífrænt ræktuðum mat. Hann er betra bensín fyrir bílinn - eða líkamann – sem mun þá væntanleg ganga betur. Minna af eitur- og rotvarnarefnum léttir álagið á líkamann. Svo er það hreyfingin. Við þurfum að hreyfa okkur til að viðhalda styrk líkamans. Hér áður fyrr þegar flestir stunduðu líkamlega vinnu, þurfti enginn að fara í ræktina. Nú þegar ótal margir stunda vinnu sína fyrir framan tölvuskjá – þar með talin ég – þá þurfum við að þjálfa vöðvana sem eru ónotaðir mestan hluta dags. Einfaldasta og ódýrasta leiðin til líkamsræktar er að fara út að ganga. Ef þig vantar félagsskap til að drífa þig af stað er hægt að fá einhvern fjölskyldumeðlim eða vin með sér. Þegar sól hækkar á lofti má sameina líkamsrækt því að fara fram og tilbaka í vinnuna, til dæmis með því að ganga eða hjóla. Nauðsynlegt er að gera teygjuæfingar eftir góða gönguferð – og svo er einfalt mál að leggjast á bakið á gólfið og gera nokkrar magaæfingar. Eitt frábært ráð til að halda meltingunni góðri er að taka inn eina matskeið af grænni ólífuolíu 3-4 sinnum yfir daginn. Og svo er bara að drekka meira vatn og minna kaffi. Líkaminn á þá auðveldar með að skola út alls kyns eiturefnum sem bæði koma úr matnum, andrúmsloftinu og öðru í umhverfi okkar. |
