“Ég brosi við lífinu og lífið brosir við mér.”
| DAGUR JAÐAR FYRR OG NÚ |
|
Í Bandaríkjunum fagna menn því í dag að 40 ár eru liðin síðan Earth Day eða Dagur Jarðar var fyrst haldinn þann 22. apríl 1970. Hugmyndina að honum átti öldungadeildarþingmaðurinn Gaylord Nelson og orðaði hana fyrst við Kennedy forseta árið 1962. Þótt Kennedy væri áhugasamur um málið náði það ekki athygli þingsins í heild. Gaylord hélt samt áfram að berjast fyrir umhverfismálum eftir hefðbundnum leiðum, uns hann gerði sér grein fyrir að sá hópur sem hann ætti ef til vill að beina orðum sínum til væru háskólastúdentar og mótmælendur Víetnam stríðsins. Í september 1969, tilkynnti hann að næsta vor yrði stefnt á að halda Dag Jarðar. Þótt hvorki væri til að dreifa farsímum, Twitter né Facebook í þá daga, bárust boðin ótrúlega hratt um öll Bandaríkin. Grasrótin brást vel við og talið er að 20 milljónir manna hafi, ásamt þúsundum skóla og sveitarfélaga tekið þátt í fyrsta DEGI JARÐAR. Þar með ruddu þeir brautina fyrir umhverfisverndarsamtökum síðari tíma. DAGUR JARÐAR Á ÍSLANDI Einhverjar hugmyndir um Dag Jarðar komu fram hér á landi árið 1990, en þá auglýsti Reykjavíkurborg eftir hugmyndum að úrbótum í umhverfismálum. Stefnt var að því að verðlauna bestu hugmyndina, en til þess kom þó aldrei. Á þessum tíma stóðu eftirtaldir aðilar, þeir Guðmundur heitinn Einarsson verkfræðingur, Baldvin Jónsson þáverandi auglýsingastjóri Mbl., Hallgrímur Magnússon læknir, Pétur Sveinbjarnarson framkvæmdastjóri, Guðlaugur Bergmann framkvæmdastjóri, Guðrún G. Bergmann framkvæmdastjóri og Ólafur Stephensen framkvæmdastjóri að Íslendingafélagi í Reykjavík, en tilgangur félagsins var að vinna að jákvæðum málefnum fyrir landann. Eftirfarandi eru nokkrar af þeim tillögum sem þau sendu til hugmyndabankans: • Koma upp endurvinnslu á pappír, áldósum, plasti og gleri  • Styrkja fyrirtæki sem færu út í endurvinnslu• Bjóða upp á flokkunartunnur fyrir einbýlishús eða koma þeim upp í hverfunum • Koma á fót átaki í aukinni gróðursetningu í trjáreiti í borgarlandinu eða í einkagörðum • Allir bílar borgarinnar gengju fyrir blýlausu bensíni • Fólk hvatt til að sameinast um bíla þegar það færi í vinnuna • Fólk hvatt til að ganga, hjóla eða nota almenningssamgöngur • Borgarbúar hvattir til að rækta eigið grænmeti • Verslanir hvattar til að hafa umhverfisvænar vörur eða vörur sem mætti endurvinna til sölu • Hvatt yrði til notkunar á sparneytnum bílum • Hvatt yrði til notkunar á hreinsiefni sem innihéldu lítið eða ekkert fosfat • Gefinn yrði út hugmyndabæklingur fyrir grunnskólakennara þar sem bent væri á hvernig tengja mætti umhverfisvernd öðru kennsluefni • Einstaklingum og fyrirtækjum yrði veitt viðurkenning fyrir mengunarvarnir, góða umgengni og virðingu við náttúruna Tillögurnar eru auðvitað barn síns tíma og ljóst er að margt hefur áunnist í umhverfismálum á undanförnum 20 árum. Við höfum því gengið til góðs götuna fram eftir veg. Óskandi væri þó að ekki liðu önnur 20 ár áður en búið væri að koma upp flokkunarkerfi á sorpi við öll íbúðarhús, þar með talin fjölbýlishús, í Reykjavík, hjólastígar yrðu fleiri og almenningssamgöngur betur nýttar. Ég hvet eindregið til þess að Dagur Jarðar verði tekinn upp hér á landi. Þótt við séum lítils megnug þegar eldsumbrot eru annars vegar, þá getum við auðveldlega sýnt umhverfi okkar meiri umhyggju með því að temja okkur grænni lífsstíl.
Guðrún G. Bergmann hefur stundað umhverfisvottaða ferðaþjónustu á Hellnum í 10 ár og er höfundur bókarinnar Konur geta breytt heiminum með nýjum lífsstíl. |
