Uppskriftir frá Snædísi Róberts

“Gleðin veitir mér styrk til að aðlaga mig nýjum aðstæðum.”

Snædís Róbertsdóttir er dagmamma með mikinn áhuga á hollu mataræði sem hentar barnafjölskyldum. Að auki flokkar hún allan úrgang hjá sér, er með moltugerð, ræktar eigið grænmeti og tileinkar sér almennt mjög grænan lífsstíl.

Hún sér um Uppskriftir Snædísar á vefsíðunni www.konurgeta.is.
Hægt er að hafa samband við Snædísi með því að senda póst á: snaedis71[hja]simnet.is

Uppskriftir frá Snædísi Róberts

Dásamleg fiskisúpa

1 laukur
1 hvítlauksrif
1 gulrót
2-3 sellerístilkar
1 græn paprika
2-3 kartöflur

1. Grænmetið afhýðað og skorið í hæfilega stóra bita.

2. Hvítlaukurinn marinn í hvítlaukspressu eða skorinn smátt

3. Allt steikt í stórum potti í dálitlu smjöri eða olíu.

1 lítil dós tómat purée
1 lárviðarlauf
1/2 tsk basil
1 tsk salt
2 bollar soð (vatn og 2 teningar, mega vera kjúklinga- eða grænmetisteningar)

Öllu ofangreindu bætt í og soðið þar til grænmetið er meyrt.

7-800 g fiskur að eigin vali (ýsa, þorskur, rækja, humar, krabbi.....)
1/2 bolli rjómi

1. Fiskurinn hreinsaður og skorinn í litla bita.

2. Fiskurinn settur út í og potturinn látinn standa smá stund á hellunni.

3. Rjómanum bætti við og súpan er borin fram

Þessi súpa er dásamlega góð og ákaflega falleg. Líka gott að gera hana deginum áður fyrir veislu og setja þá bara fiskinn og rjómann í rétt áður en hún er borin fram. Mér finnst líka stór kostur að það má bæði gera hana ódýra og líka splæsa í humar og dýrari fisk við betri tækifæri.

Brownies

Þetta er upprunalega uppskriftin en svo má skipta hveiti út fyrir spelt, nota hrásykur og lífænt efni.

2 egg

1 bolli sykur

1/2 bolli brætt smjörlíki

1 bolli hveiti

1,5 msk kakó

1/2 tsk lyftiduft

1/2 tsk salt

1 tsk vanilludropar

1/2 bolli sax rúsínur

1/2 bolli sax hnetur eða möndlur.

1. Bræðið smjörlíkið og látið kólna örlítið

2. Þeytið saman sykur og egg, má þeyta dálítið lengi.

3. Sigtið saman hveiti, kakó og lyftiduft. Bætið salti saman við. Hrærið ásamt bræddu smjörlíki og vanilludropum útí deigið. Hrærið vel en ekki óþarflega mikið saman með sleikju.

4. Saxið hnetur og rúsínur og blandið saman við deigið.

5. Smyrjið frekar litla ofnskúffu og smyrjið deiginu jafnt í hana.

6. Bakið við 200 C í 12-15 mín í miðjum ofni.

7. Skerið í bita, losið úr skúffunni og kælið á grind

Fyrir barnaveislur hef ég hana svona og sker í mjög litla bita svo passi í litla hendi án þess að molna um allt og þau geta fengið sér sjálf sem er SVO stór kostur :o)

Dálítið meira spari er hér syndsamlega gott hnetusmjörskrem!

1 bolli flórsykur

1 bolli hnetusmjör

5 msk smjör

1/3 bolli rjómi

Hrært saman í hrærivél, smurt á og etv stráð súkkulaðispæni yfir.

Lífrænn grjónagrautur.

Grjónagrautur er ódýr, hollur, góður og barnvænn matur. Það eru margar útfærslur til af honum. Mín er svona:

1/2 bolli íslenskt bygg
1/2 bolli lífræn hýðisgrjón (ég kaupi þau í 10kg pokum í Fjarðarkaupum)
2 bollar vatn

Þetta læt ég bullsjóða í smá stund og slekk svo undir, oft kvöldinu áður, eða um morguninn. ef ég ætla að elda um kvöldið. Svo fer líter af mjólk, soja eða hrís er líka góð og látið malla þar til fer að þykkna, set svo teskeið af vanillusykri, teskeið af salti og 1/2 bolla rúsínur og læt sjóða með síðustu mínúturnar. Ber þetta fram með lifrapylsu og mér finnst alveg jafngott að strá bara kanel yfir, óþarfi að hafa sykur.

Rúgbrauð

Þetta brauð er mjög vinsælt á mínu heimili. Ég læt oft einn bauk af Agave sýrópi (425g) duga í uppskriftina til að hafa hana dálítið hollari.

2 bollar heilhveiti
4 bollar rúgmjöl
1 líter súrmjólk
500g sýróp
3 tsk matarsódi
3 tsk salt

Öllu hrært saman og sett í mjólkurfernur, mackintosh dós eða í steikarpottinn með bökunarpappír undir og yfir. Bakað við 100 gráður í 9 stundir.